Lè colpa d’Al Fagot
Indal 1993, al redatùr d’Al Fagot léa decìs da dervì na rübrica «Pusc’ciavìn indal mond» e’l m’à dumandù sa ga staròi a la lancià. Ilura lauréi già cula Misiòn Svìzara ali Naziòn Ünidi a Noiòrk. Sem stait sübit d’acordi da cüntasü un pit mei ventüri da giramònd. Cun quasi 55 àn süindal bumbulìf, cun me mesté da diplumàtich, cun avé laurù 8 àn anca in Africa, un per da rubetini pudéi an cüntasü. Inscì, ì pö mütügiò mia autubiugrafìa in taliàn, e tanc gli àn pudü la legia ind’Al Fagot dal 1994.
Dopu da ilura, ogni tre mes ga mandéi üna da mei Létari da Noiòrk in pusc’ciavìn par Al Fagot. Al ma plaséa fà sta ciaciarada, pür iniscrìt, e cüntasü un po’ cume vivéum cun mia fema inda sta megalòpoli, li scuperti ca féum dala vita dagli Americàn, li ventüri ca ghéum cura géum in vacanza (cume in Florida, Hawaii, California, Canada, Puerto Rico, Jamaica, Louisiana, ecc). Parléi pö anca da me mesté e dai viac ca féi par al lauréri (anca in altri paés cume la Cina, al Bangladesh, al Brasil). Par mì lèra’l plasé da li scriva sti Létari da Noiòrk. Lèra anca na manera par miga smentigà la parlada da me paés. Infati, a Noiòrk pudéi duperà ogni dì l’inglés, al francés, al spagnòl, parfìn al tudésch e’l taliàn, però mai la lingua ca éi imparù cun amò sü i patéi… Inscì, in 6 àn ca sem stait in America, n’ì scrit dua buni dunzeni da sti Létari da Noiòrk, tüti püblicadi ind’Al Fagot.
L’estat pasù, ì decìs da li ramascià inzem indan fascìcul sul, par ga li avé plü còmat cura voli ma regordà üna dali ventüri da mei 60 àn pasài. Lé inscì ca lé nasü un libretìn da 150 pagini ca ì pensù da’l ciamà apuntu Létari da Noiòrk. Manegévul cume ca lé vignifò, podi ga l’avé sempri a purtada da man cura ghì vöia da ma ramentà ün o l’altru di mumént memuràbil da mia vita. E pö ma sem dit ca’l ga plasaròf magari anca a altri Pusc’ciavìn da pudé legia ogni tant quai righi inda nosa bela lingua.
; la Lataria; la Posta ; da Ceia ; tipugrafii Isepponi e Menghini), a Li Presi (da Tacu), a San Carlu (la Lataria e’l Negozio Crameri). Sem sügür ca’l va rincresarà mai. Buni Festi da Natal e da Capudàn!
Redatto da Dino Beti di Panìsc – dino.beti@bluewin.ch